'ഇം​ഗ്ലണ്ട് പരമ്പരയിലെ റിസൾട്ടിന്റെ അടിസ്ഥാനത്തിൽ ബുംമ്രയുടെ വിശ്രമം തീരുമാനിക്കും': ​​ഗൗതം ​ഗംഭീർ

ഈ മാസം 20ന് ആരംഭിക്കുന്ന ഇം​ഗ്ലണ്ടിനെതിരായ അഞ്ച് ടെസ്റ്റുകളുടെ പരമ്പരയിൽ ജസ്പ്രീത് ബുംമ്ര എത്ര മത്സരങ്ങൾ കളിക്കുമെന്നതിൽ പ്രതികരണവുമായി ഇന്ത്യൻ ടീം പരിശീലകൻ ​ഗൗതം ​ഗംഭീർ. 'ബുംമ്ര എത്ര മത്സരങ്ങൾ കളിക്കുമെന്നതിൽ തീരുമാനം ആയിട്ടില്ല. പരമ്പരയിലെ റിസൾട്ടിന്റെ അടിസ്ഥാനത്തിൽ ടീം ബുംമ്രയുമായി സംസാരിക്കും. ടീമിന്റെ സാഹചര്യങ്ങളെക്കുറിച്ച് ബുംമ്രയ്ക്കും അറിവുണ്ടാകും,' ഇം​ഗ്ലണ്ട് പരമ്പരയ്ക്ക് മുമ്പായുള്ള വാർത്താസമ്മേളനത്തിൽ ​​ഗംഭീർ പറഞ്ഞു.

'ബുംമ്രയെ ഒഴിവാക്കുക എളുപ്പമല്ല. എന്നാൽ ചാംപ്യൻസ് ട്രോഫിക്ക് മുമ്പ് ഞാൻ പറഞ്ഞതുപോലെ ബുംമ്രയ്ക്ക് പകരക്കാരനാകാൻ മറ്റുള്ളവർക്ക് അവസരം നൽകണം. അതിന് കഴിയുന്ന താരങ്ങൾ ഇന്ത്യൻ ടീമിലുണ്ട്,' ​ഗംഭീർ പ്രതികരിച്ചു.

ശ്രേയസ് അയ്യരിനെ ടീമിൽ എടുക്കാത്തതിനെക്കുറിച്ചും ​ഗംഭീർ പ്രതികരിച്ചു. ഏതൊരു താരത്തെയും ഇന്ത്യൻ ടീമിൽ ഉൾപ്പെടുത്താൻ കഴിയും. പക്ഷേ പരമാവധി 18 താരങ്ങളേയെ ടീമിലേക്ക് വിളിക്കാൻ കഴിയൂ. ഇന്ത്യൻ ക്രിക്കറ്റ് ടീം ചീഫ് സെലക്ടര്‍ ഇക്കാര്യം സംസാരിച്ചതാണ്. ​ഗംഭീർ വ്യക്തമാക്കി.

ജൂൺ 20 മുതലാണ് ഇന്ത്യയും ഇം​ഗ്ലണ്ടും തമ്മിലുള്ള ആദ്യ ടെസ്റ്റ് നടക്കുക. ഇന്ത്യൻ ടീമിനെ നേരത്തെ തന്നെ പ്രഖ്യാപിച്ചിരുന്നു. പുതിയ ക്യാപ്റ്റൻ ശുഭ്മൻ ​ഗില്ലിന്റെ കീഴിൽ ഇന്ത്യയുടെ ആദ്യ പരമ്പരയാണിത്. വിരാട് കോഹ്‍ലിയുടെയും രോഹിത് ശർമയുടെയും അഭാവത്തിൽ ഇം​ഗ്ലണ്ടിൽ മികച്ച പ്രകടനം നടത്തുക എന്നതാണ് ഇന്ത്യയ്ക്ക് മുന്നിലുള്ള വെല്ലുവിളി.

Content Highlights: Which Tests Bumrah misses will depend on the state of the series, says Gambhir